जनसंपर्क न्यूज – मुंबई महानगर जैन शासनाच्या इतिहासात एक अविस्मरणीय आणि ऐतिहासिक क्षणाचा साक्षीदार ठरला, जेव्हा बोरीवली पश्चिमेतील चिकूवाडी मैदानात आयोजित ‘संयमरंग उत्सव’ दरम्यान 64 मुमुक्षूंनी संसाराचा त्याग करून जैन दीक्षा स्वीकारली. हजारो भाविक आणि समाजबांधवांच्या उपस्थितीत पार पडलेल्या या दीक्षा समारंभामुळे संपूर्ण परिसर आध्यात्मिक ऊर्जेने भारावून गेला.
पहाटेपासूनच कार्यक्रमस्थळी भाविकांची मोठी गर्दी जमू लागली. सकाळी 4 वाजल्यापासूनच भक्त, नातेवाईक आणि समाजातील मान्यवर दीक्षार्थींना शुभेच्छा देण्यासाठी उपस्थित राहिले. काही वेळातच विस्तीर्ण मैदान मानवी सागराने भरून गेले. अंदाजे 25 हजारांहून अधिक लोक या ऐतिहासिक प्रसंगाचे साक्षीदार ठरले.
हा महोत्सव शांतिचंद्रसूरी समुदायाचे गच्छाधिपती आचार्य सोमसुंदरसूरीजी, आचार्य योगतिलकसूरीजी, आचार्य कुशलचंद्रसूरीजी आणि आचार्य पुण्यसुंदरसूरीजी तसेच मोठ्या संख्येने उपस्थित साधू-साध्वीजींच्या पावन सान्निध्यात संपन्न झाला. आचार्य भगवंतांच्या आशीर्वादाने दीक्षार्थींनी संयम जीवनातील कठोर व्रते स्वीकारली.
सकाळी सुमारे 9.30 वाजता ‘रजोहरण’ अर्पण विधीच्या वेळी संपूर्ण मैदान “जैनं जयति शासनम्” या घोषणांनी दुमदुमून गेले. दीक्षा विधीदरम्यान अनेक कुटुंबांसाठी भावनिक क्षण अनुभवायला मिळाले. आपल्या आप्तस्वकीयांना संयम मार्गावर जाताना पाहून अभिमानासोबतच विरहाची भावना निर्माण झाली, मात्र धर्मावरील श्रद्धा सर्वोच्च ठरली.
या महोत्सवातील विशेष आकर्षण ठरले अध्यात्म परिवाराशी संबंधित युवा कार्यकर्ते ऋषभभाई आणि त्यांची धर्मपत्नी सोनलबेन यांचा संकल्प. दोघांनीही तरुण वयात संसाराचा त्याग करून आजीवन ब्रह्मचर्य स्वीकारत उपस्थितांना प्रेरणा दिली.
या प्रसंगी महाराष्ट्र सरकारचे मंत्री श्री मंगल प्रभात लोढा यांनी उपस्थित राहून दीक्षार्थी आणि त्यांच्या कुटुंबीयांच्या भावनांना अभिवादन केले. याशिवाय जैन समाजातील अनेक मान्यवर, ट्रस्टी आणि विविध संस्थांचे प्रतिनिधीही उपस्थित होते.
उल्लेखनीय बाब म्हणजे चिकूवाडी मैदान यापूर्वीही ऐतिहासिक ठरले आहे. सुमारे सात वर्षांपूर्वी येथे 44 दीक्षा पार पडल्या होत्या. आताच्या 64 दीक्षांसह एकाच भूमीवर एकूण 108 दीक्षांचा ऐतिहासिक टप्पा पूर्ण झाला आहे.
आयोजनात पर्यावरण संवर्धनालाही विशेष महत्त्व देण्यात आले. हजारो लोकांसाठी करण्यात आलेल्या भोजन व्यवस्थेत प्लास्टिक आणि डिस्पोजेबल वस्तूंचा वापर टाळण्यात आला, तसेच स्वच्छता राखण्यासाठी स्वयंसेवक सातत्याने कार्यरत होते.
या 64 संयमींची ‘वडी दीक्षा’ श्री शांतिचंद्र शताब्दी महोत्सवाअंतर्गत येत्या 7 मार्च रोजी पुन्हा बोरीवली येथे आयोजित करण्यात येणार असून, मोठ्या संख्येने भाविक उपस्थित राहतील, अशी अपेक्षा व्यक्त करण्यात येत आहे.
